Muzey 1981-ci ildə Ümummilli lider Heydər Əliyevin təşəbbüsü ilə milli hərb tariximizin görkəmli nümayəndəsi, ilk Azərbaycan Atıcı Diviziyasının yaradıcısı və komandiri, novator sərkərdə Cəmşid Cəfərqulu xan oğlu Naxçıvanskinin anadan olmasının 85 illiyi ilə əlaqədar yaradılmış, 1982-ci ilin 22 oktyabrında fəaliyyətə başlamışdır. Muzeyin fəaliyyət göstərdiyi inzibati bina Cəmşid Naxçıvanskinin ata evi olub, XIX əsr tarix-mədəniyyət abidəsidir. Muzeydə, Cəmşid Naxçıvanskinin həyat və fəaliyyətini əks etdirən sənədlər, fotoşəkillər, çap məhsulları, rəssamlıq əsərləri, məktub və əlyazmalar, məişət-etnoqrafiya əşyaları, orden və medallar və digər materiallardan ibarət ümumilikdə 5500-dən artıq maddi-mədəniyyət nümunəsi mühafizə olunur ki, bunlardan da 630-dan çoxu 6 ekspozisiya zalında nümayiş etdirilir. Ekspozisiyada, görkəmli sərkərdənin şərəfli döyüş yolunu əks etdirən kitab və monoqrafiyalar, rəsm, qrafika və reproduksiyalar, numizmatika nümunələri, ailəyə məxsus xatirə əşyaları, həmçinin milli dövlətçilik tariximizdə xüsusi yeri olan Araz-Türk Cümhuriyyətinə aid müfaviq materiallar xüsusi yer tutur.
Ünvan: Naxçıvan şəhəri, Atatürk küçəsi 6
Tel: +994 (36) 545-21-16