Ölkəmiz öz müstəqilliyini bərpa etdikdən sonra Naxçıvan Muxtar Respublikası ərazisində Azərbaycan memarlığının Naxçıvan məktəbi ənənələrini özündə yaşadan və inkişaf etdirən çoxlu abidələr inşa etdirilmişdir. Belə abidələrdən biri də görkəmli Azərbaycan şairi və dramaturqu Hüseyn Cavidin qəbri üzərində ucaldılmış məqbərədir. Bu məqbərə xalqımızın ümummilli lideri Heydər Əliyevin şəxsi təşəbbüsü və himayəsi ilə inşa edilmişdir. Əcəmi Naxçıvani memarlıq üslubunun təsiri aydın hiss edilən abidə sərdabə və onun üzərində ucaldılan türbədən ibarətdir. Türbə tikilərkən Hüseyn Cavidin ömür-gün yoldaşı Müşgünaz xanımın və oğlu Ərtoğrolun qəbirləri də 1996-cı ildə buraya köçürülmüşdür. Hüseyn Cavidin qızı Turan xanım da 2004-cü ildə vəfat etdikdən sonra sərdabədə ailə üzvlərinin yanında dəfn olunmuşdur.
Məqbərənin layihəsinin müəllifi Azərbaycan Respublikasının Əməkdar memarı Rasim Əliyev, heykəltaraşı Xalq rəssamı Ömər Eldarovdur.
Hüseyn Cavidin anadan olmasının 114 illiyi münasibətilə 1996-cı il oktyabrın 29-da abidənin açılışı olmuşdur. Azərbaycan xalqının ümummilli lideri Heydər Əliyev məqbərənin açılış mərasimində iştirak etmiş və nitq söyləmiş, bu möhtəşəm abidəni belə xarakterizə etmişdir: Hüseyn Cavid məqbərəsi Naxçıvanın memarlıq tarixinə yeni bir səhifədir. Naxçıvanda böyük memarlıq, milli, mədəni abidələrimiz var. Bu abidə də həmin ənənələrin davamıdır. Ümidvaram ki, “Möminə Xatın” abidəsi kimi, bu abidə də əsrlər boyu yaşayacaqdır. Güman edirəm ki, gələcək nəsillər bu günü xatırlayacaq və bu abidəni yaradanları unutmayacaqdır”.
Məqbərənin ətrafında geniş abadlıq işləri aparılmışdır. Hazırda Hüseyn Cavid məqbərəsi əhalinin və şəhərimizin qonaqlarının ziyarət, ətrafı isə istİrahət yerinə çevrilmişdir.