Muzey 1998-ci ilin yanvar ayında yaradılmışdır. 1998-ci ilin aprelindən Xan sarayında fəaliyyətə başlayan muzey 2010-cu ildən 2024-cü ilədək Heydər Əliyev prospektindəki binada fəaliyyətini davam etdirib. 2022-ci ildə muzeyə Azərbaycan Respublikasının Xalq rəssamı Kamil Əliyevin adı verilmişdir.
Muzeyin fondunda 3 mindən çox maddi-mədəniyyət nümunəsi vardır. Buradakı xalçaların demək olar ki, hamısı Naxçıvan xalçaçılıq məktəbinə aiddir. Muzeyin fondunda müxtəlif dövrlərə aid nəfis və zərif naxışlarla zəngin xalçalar qorunub saxlanılır. Xovlu xalçalar, məfrəş, palaz, cecim, kilim, sumax, keçə, həsir, süjetli və digər xalça növləri müxtəlif əsrlərə aiddir. Xalçalardakı həndəsi və nəbati formalı naxışlar uzaq keçmişdən xəbər verən milli mədəniyyətimizin tarixini səciyyələndirir. Naxışları sadə, realist və ya mücərrəd olan xalçalar Azərbaycan xalqının yaradıcılıq imkanlarının yüksək səviyyədə olduğunun göstəricisidir. Muzeyin fondunda bədii tikmə və parça nümunələri, vərni toxunuşlu ox çantaları, xurcunlar, örkən, heybə, səccadə, yun darağı, cəhrə, taxta və dəmir həvələr, kirkitlər, ilmə bıçağı və digər eksponatlar qorunub saxlanılır.