Klub müəssisələrinin fəaliyyətinə birbaşa nəzarəti Naxçıvan Muxtar Respublikasının Mədəniyyət Nazirliyi, həmçinin Nazirliyə tabe olan rayon (şəhər) mədəniyyət idarə və şöbələri həyata keçirir.
Klub müəssisələrinin fəaliyyətinin predmeti xalq yaradıcılığının dəstəklənməsi, yerləşdiyi ərazilər üzrə xalq yaradıcılığı nümunələrinin toplanması, Azərbaycanın qeyri-maddi mədəni irsinin qorunması, bərpası, yaşadılması və inkişaf etdirilməsi, əhalinin asudə vaxtının səmərəli təşkilindən ibarətdir. Mədəniyyət müəssisələrinin fəaliyyətinin əsas məzmunu əhatə etdiyi ərazidə xalq yaradıcılığının və Azərbaycanın qeyri-maddi mədəni irsinin hüquqi, metodik məlumat, kadr və maddi-texniki cəhətdən təkmilləşdirilməsindən, eləcə də ölkənin qeyri-maddi mədəni irsinin diyarşünaslıq, folklor və sənətkarlıq kimi əsas sahələrinin bilavasitə təşkilindən ibarətdir.
Klub müəssisələrinin tərkibinə aşağıdakı struktur bölmələri daxildir:
1. Mədəniyyət sarayları
2. Mədəniyyət evləri
3. Klublar
Naxçıvan Muxtar Respublikasında, ümumilikdə, 193 klub müəssisəsi fəaliyyət göstərir. Həmin klub müəssisələrinə - Heydər Əliyev Sarayı və 7 rayon mədəniyyət sarayı, 97 şəhər, qəsəbə və kənd mədəniyyət evi, 88 şəhər, qəsəbə və kənd klubu daxildir.