Martın 6-da – Azərbaycan Xalq Cümhuriyyətinin banisi, Azərbaycanın görkəmli dövlət və ictimai xadimi, publisisti Məhəmməd Əmin Rəsulzadənin vəfatı günündə Şahbuz Rayon Mədəniyyət Sarayında “Bir kərə yüksələn bayraq, bir daha enməz” adlı tədbir keçirilib.
Mədəniyyət üzrə Elmi-Metodik Mərkəzin və Şahbuz Rayon Mədəniyyət Şöbəsinin təşkilatçılığı ilə keçirilən və M. Ə. Rəsulzadənin 140 illik yubileyinə həsr olunan tədbiri giriş sözü ilə Mərkəzin direktoru Səyyar Məmmədov açıb. Bildirilib ki, bu ilin yanvar ayında görkəmli ictimai-siyasi xadim, Azərbaycan Xalq Cümhuriyyətinin banilərindən biri, Azərbaycan Milli Şurasının sədri Məhəmməd Əmin Rəsulzadənin anadan olmasının 140 ili tamam oldu. Bu münasibətlə ölkə Prezidenti cənab İlham Əliyev ötən il dekabrın 30-da “Məhəmməd Əmin Rəsulzadənin 140 illiyinin qeyd edilməsi haqqında” Sərəncam imzalayıb.
Vurğulanıb ki, Məhəmməd Əmin Rəsulzadə XX əsrin ilk onilliklərində böhranlı geosiyasi şəraitdə Azərbaycanda müstəqillik idealının gerçəkləşdirilməsi və milli dövlət quruluşunun dirçəldilməsi yolunda böyük xidmətlər göstərmiş şəxsiyyətlərdəndir. Onun istiqlal məfkurəsi öz mənbəyini doğma xalqının çoxəsrlik yaddaşında kök salmış milli azadlıq düşüncəsindən alırdı.
Şahbuz Rayon Mədəniyyət Şöbəsinin tabeliyindəki klub müəssisələrində çalışan əməkdaşların iştirak etdiyi tədbirdə Mərkəzin şöbə müdiri Zəminə Gülməmmədovanın və Mədəniyyət Şöbəsinin məsləhətçisi Elvin Səfərovun “Cümhuriyyətin banisi Məhəmməd Əmin Rəsulzadə” və “Görkəmli şəxsiyyət Məhəmməd Əmin Rəsulzadə” mövzularında çıxışları olub. Bildirilib ki, “Milli istiqlala malik olmayan bir millət, hürriyyət və mədəniyyətini də hifz edə bilməz. İnsanlara hürriyyət, millətlərə istiqlal”, – deyən M. Ə. Rəsulzadə sadəcə Milli İstiqlal yolunu göstərmədi, həm də bu yolun dəqiq xəritəsini cızaraq bu yolda irəliləyən millətin bələdçisinə çevrildi. Onun “Bir kərə yüksələn bayraq, bir daha enməz” nidası XX əsrdə Azərbaycanda müstəqillik hərəkatının şüarı olub.
Tədbirin bədii hissəsində M. Ə Rəsulzadənin yaradıcılığından nümunələr bədii qiraət edilib.