“Dünya İncəsənət Günü” və “Uşaq İncəsənət Festivalı”nın açılışına həsr olunmuş tədbir keçirilib
Naxçıvan Muxtar Respublikası Mədəniyyət Nazirliyinin təşkilatçılığı ilə Heydər Əliyev Sarayanında “Dünya İncəsənət Günü” və “Uşaq İncəsənət Festivalı”nın açılışı ilə əlaqədar olaraq tədbir keçirilib.
Əvvəlcə Sarayın foyesində Naxçıvan Dövlət Rəsm Qalereyasında olan rəsm əsərlərindən və Nazirliyin sistemindəki klub müəssisələrində fəaliyyət göstərən dərnək üzvlərinin əl işlərindən ibarət sərgiyə baxış keçirilib.
Tədbirdə çıxış edən Naxçıvan Muxtar Respublikası Mədəniyyət Nazirliyi Aparatının sektor müdiri Həcərxanım Məmmədova qeyd edib ki, Mədəniyyət, incəsənət hər bir xalqın ən qiymətli sərvəti, tarixi varlığının, milli kimliyinin sübutudur. Dünyanın harasında, kim tərəfindən, necə yaranmasında asılı olmayaraq hər bir mədəniyyət, incəsənət nümunəsi tayı-bərabəri olmayan bir sərvətdir.
Vurğulanıb ki, bu gün bu tədbirlə incəsənət sahəsində uşaq və yeniyetmələr üçün olduqca əhəmiyyətli bir layihənin "Uşaq İncəsənət Festivalı"nın açılışına start verilməsi heçdə təsadüfi deyil.
Tədbirin bədii hissəsində Naxçıvan Dövlət Filarmoniyasının Mahnı və Rəqs Ansamblının rəqs kollektivi tərəfindən “Yallı rəqsi”, “İnnabı” və Şərur Xalq Yallı Ansamblı tərəfindən isə “Xələfi Yallısı” təqdim olunub.
Sonra Naxçıvan Dövlət Filarmoniyasının solistləri – Azərbaycan Respublikasının Əməkdar artisti Gülyanaq Fərzəliyeva, Emin Hüseynov tərəfindən “Arzu”, “Sevgili canan”, Kamera Orkestri tərəfindən isə “Qramafan vals”, “Şəhrizadın bayramı” və digər musiqi nömrələri ifa edilib.
Konsert proqramı tamaşaçılar tərəfindən alqışlarla qarşılanıb.
