Növbəti seminar keçirilib
Məmməd Səid Ordubadi adına Naxçıvan Muxtar Respublika Kitabxanasında kitabxana işçilərinin peşəkarlıq səviyyəsinin artırılması məqsədilə “Daxil olan çap məhsullarının uçotu” mövzusunda seminar keçirilib.
Seminarı giriş sözü ilə Naxçıvan Muxtar Respublikası Mədəniyyət Nazirliyi Aparatının baş məsləhətçisi Aygün Heydərli açaraq qeyd edib ki, kitabxanaçıların bilik və bacarıqlarının hərtərəfli inkişafına nail olmaq üçün keçirilən seminarlar kitabxanalarda təşkil olunmuş işin günün tələbləri səviyyəsində qurulmasına köməklik məqsədi daşıyır. Bu günkü seminar bu prosesin bir hissəsidir və onun əsas məqsədi kitabxana fondlarının idarə olunmasının vacib elementi olan daxil olan çap məhsullarının uçotu mövzusunu dərindən öyrənmək, müasir yanaşmaları müzakirə etməkdir.
Məmməd Səid Ordubadi adına Naxçıvan Muxtar Respublika Kitabxanasının Komplekləşdirmə şöbəsinin müdiri Rahilə Məmmədova “Daxil olan çap məhsullarının uçotu” haqqında məlumat verərək bildirib ki, kitabxanaya çap məhsulları satınalma, abunə, bəxşiş, itirilmiş kitab əvəzinə oxucunun başqa kitab verməsi, başqa kitabxanadan kitab verilməsi və s. müxtəlif mənbələrdən daxil olur. Daxil olan kitablar qoşma sənədlə tutuşdurulub yoxlanılır. Çap məhsulları qoşma sənədlə tutuşdurulduqdan və kitabxana fondunun ümumi uçot kitabına qeyd edildikdən sonra inventar kitabına yazılır. Uçot kitabları cildlənməli, nömrələnməli, qaytanlanmalı və kitabxananın tabe olduğu təşkilat (idarə) tərəfindən möhürlənməlidir.
Sonra mövzu ilə bağlı slayd nümayiş edilib, Naxçıvan Muxtar Respublikası şəhər (rayon) Mərkəzləşdirilmiş Kitabxana Sisteminin əməkdaşlarının sualları cavablandırılıb.
