“Qanlı tarix – 26 fevral” adlı tədbir keçirilib
“Qanlı tarix – 26 fevral” adlı tədbir keçirilib
Culfa Rayon Mədəniyyət Sarayında Xocalı soyqırımının 33-cü ildönümünə həsr olunmuş “Qanlı tarix – 26 fevral” adlı tədbir keçirilib. Tədbir iştirakçıları əvvəlcə Xocalı soyqırımına həsr olunmuş sərgiyə baxıblar.
Mədəniyyət üzrə Elmi Metodik Mərkəzin və Culfa Rayon Mədəniyyət Şöbəsinin təşkilatçılığı ilə keçirilən tədbiri Mərkəzin direktoru Səyyar Məmmədov giriş sözü ilə açaraq bildirib ki, 1992-ci il fevralın 25-dən 26-na keçən gecə Qanlı Xocalı qırğınını törətməklə Dağlıq Qarabağın hüdudlarından kənara çıxan Ermənistan Azərbaycana qarşı genişmiqyaslı təcavüzə başladı. Ermənistan – Azərbaycan Dağlıq Qarabağ münaqişəsi zamanı 20 min vətəndaşımız öldürüldü, 50 min nəfərdən çox adam yaralandı və əlil oldu, ölkəmizin ərazisinin 20 faizi işğal edildi.
Sonra Mədəniyyət üzrə Elmi-Metodik Mərkəzin böyük elmi işçisi Aytəkin Əliyevanın “Azərbaycanın qanayan yarası – Xocalı soyqırımı” və Culfa rayon Bənəniyar Kənd Musiqi Məktəbinin müəllimi Səmənnaz Qurbanovanın “Xocalının tarixi” mövzularındakı çıxışlarında qeyd olunub ki, 1992-ci il fevralın 25-dən 26-na keçən gecə cinayətkar erməni qoşunlarının vəhşiliyi nəticəsində Xocalı əhalisindən 613 nəfər öldürüldü, 487 nəfər şikəst oldu, 1275 nəfər dinc sakin — qocalar, uşaqlar, qadınlar əsir götürülərək ağlasığmaz erməni zülmünə, təhqir və həqarətlərinə məruz qaldı. 150 nəfərin isə taleyi hələ də məlum deyil. Öz amansızlığına, vəhşiliyinə, kütləviliyinə və törədilən cinayətlərin ağırlığına görə Xocalı faciəsi insanlığın tarixində qara ləkə kimi qalacaq.
Sonda Mirvari Dilbazinin “Xocalı fəryadı” pyesi əsasənda hazırlanmış eyniadlı kompozisiyanın və “Xocalı” adlı filmin nümayişi olub.
