“Naxçıvanqala” Tarix-Memarlıq Muzey Kompleksi 2013-cü ildə yaradılmışdır. Kompleksə daxil olan Nuh peyğəmbərin məzarüstü türbəsi abidənin qalıqları üzərində 2007-cı ildə bərpa edilmişdir. Türbənin içərisində bu abidənin müxtəlif illərdə çəkilmiş rəsmləri və fotoşəkilləri, Naxçıvan ərazisində tapılmış daşlaşmış heyvan qalıqları nümayiş etdirilir.
“Naxçıvanqala”nın inşa tarixi 632-652-ci illərə aid olunur. Müharibələr nəticəsində Naxçıvanqala bir neçə dəfə dağıdılmış və bərpa edilmişdir. 2010-cu ildə isə yenidən bərpasına başlanmış və əsaslı yenidənqurma işlərindən sonra 2014-cü ildən muzey kompleksi kimi fəaliyyət göstərir.
Muzeyin fondunda 500-dən çox eksponat vardır. E.ə. V minilliyə aid təsərrüfat küpü, e.ə. V-III minilliyə aid müxtəlif məişət əşyaları, Son Tunc və Erkən Dəmir dövrlərinə aid keramika məmulatları, mis alətlər, qəbirüstü abidələr, silahlar, zirehli geyim hissələri muzeyin qiymətli eksponatlarındandır. Burada həmçinin qədim xalçalar və XIX əsrə aid milli geyimlər də nümayiş olunur.
Kompleksin mağara hissəsində də bərpa işləri aparılmışdır.
Ünvan: Naxçıvan şəhəri, C.Məmmədquluzadə küçəsi, döngə 1/4