Xəbər verdiyimiz kimi fevralın 14-də Azərbaycan Dövlət Akademik Filarmoniyasında Naxçıvan incəsənət ustalarının konsert proqramı təşkil olunub. “Şərq qapısı” qəzetinin Bakı şəhərinə ezam olunmuş əməkdaşı Aidə İbrahimova konsert iştirakçılarının fikirlərini öyrənib, onlardan müsahibə alıb.
Bakı şəhərində Naxçıvan Muxtar Respublikasının Daimi Nümayəndəliyinin rəhbəri Bəxtiyar Əsgərov: – Bildiyimiz kimi 30 dekabr 2023-cü il tarixdə Azərbaycan Respublikasının Prezidenti Naxçıvan Muxtar Respublikasının 100 illik yubileyinin ölkəmizdə qeyd olunması üçün Sərəncam imzalamışdır. Bu Sərəncamın işığında bütün ölkəmizdə muxtar respublikanın 100 illik yubileyi qeyd olunur. Təbiidir ki, ölkəmizdə 7 fevralda keçirilmiş prezident seçkilərində xalqımızın Heydər Əliyev yoluna, Prezident İlham Əliyev şəxsiyyətinə göstərdiyi etimad fonunda bu yubiley keçirilir. Naxçıvan Muxtar Respublikasının 100 illik yubileyinin keçirilməsi bir tərəfdən müstəqil Azərbaycan dövlətinin muxtar respublikamıza olan qayğısının təzahürüdürsə, digər tərəfdən muxtar respublikanın elmi, mədəni mühitinin bütün respublikamız ərazisində təbliğinə xidmət edir. Ona görə də bu 100 illik çərçivəsində, Bakı şəhərində xüsusi konsert proqramının təşkil olunması da mühüm əhəmiyyət daşıyır. Xalqımız böyük bayram əhvali-ruhiyyəsindədir. Hesab edirəm ki, keçirilən bu konsert proqramı da, çox uğurla başa çatdı.
Xalq artisti Ağaverdi Paşayev konsert barədə təəssüratlarını əməkdaşımızla bölüşüb. – Azərbaycan Dövlət Akademik Filarmoniyasında Naxçıvan Muxtar Respublikasının 100 illiyi ilə bağlı gözəl bir konsert proqramı həyata keçdi. Ən əsas onu deyim ki, burada çıxış edən ifaçılar Naxçıvandan gəlmiş, əksərən, əməkdar və tanınmış ifaçılardı. Onlar Bakıya Dövlət Akademik Filarmoniyasına qonaq buyurublar və Naxçıvan Muxtar Respublikasının 100 illik yubileyi münasibəti ilə gözəl bir konsert proqramıyla çıxış etdilər. Mən əminəm ki, bu proqram hələ bir başlanğıcdır. Qismət olsa bu proqramla Gəncədə də, Sumqayıtda da və nəhayət, Naxçıvanda da çıxış edəcəyik. Proqramda əsasən Azərbaycanın görkəmli bəstəkarları – Ramiz Mirişli, Süleyman Ələsgərov, Firəngiz Babayeva, Nazim Quliyev, Hacı Xanməmmədov və digər tanınmış bəstəkarlarların bəstələri ifa olundu.
Aidə İBRAHİMOVA
