“Bəhruz Kəngərli: Bir ömürlük sənət dərsi” mövzusunda tədbir keçirilib
Bəhruz Kəngərli Muzeyində keçirilən tədbiri giriş sözü ilə muzeyin direktoru Səbinə Əlincəli açaraq Azərbaycan rəssamlıq sənətinin görkəmli nümayəndəsi, realist rəssam Bəhruz bəy Kəngərlinin Azərbaycan incəsənətindəki müstəsna rolundan, onun yaradıcılığının mədəni irsimiz üçün əhəmiyyətindən danışıb. Bildirib ki, Bəhruz Kəngərli öz əsərlərində xalqın taleyini, dövrün sosial reallıqlarını, faciələrini böyük bədii ustalıqla əks etdirərək milli incəsənət tarixində silinməz iz qoyub.
Tədbirdə AMEA Naxçıvan bölməsinin İncəsənət, Dil və Ədəbiyyat İnstitutunun Musiqi və teatr şöbəsinin müdiri, sənətşünas Əli Qəhrəmanov “Azərbaycanda ilk peşəkar teatr rəssamı: Bəhruz Kəngərli” mövzusunda çıxış edərək rəssamın Azərbaycan teatr sənətində səhnə tərtibatının və dekorasiya mədəniyyətinin inkişafında əvəzsiz xidmətlərindən bəhs edib. Qeyd edib ki, onun səhnə tərtibatı tamaşaların ideya-bədii təsir gücünü artırmaqla yanaşı, milli teatr rəssamlığının formalaşmasında əhəmiyyətli mərhələ hesab olunur.
Sonra Filologiya üzrə fəlsəfə doktoru Aypara Behbudova “Adil Babayevin Bəhruz Kəngərliyə həsr olunmuş “Yarımçıq şəkil” pyesi” mövzusunda çıxışı ilə əsərdə rəssamın yarım qalmış taleyinin və yaradıcılıq yolunun simvolik bədii ifadə vasitələri ilə təqdim olunduğunu vurğulayıb. Bildirib ki, dramaturq pyesdə sənətkarın erkən vəfatını, həyata keçməmiş arzularını simvolizə edir. Bu əsər Bəhruz bəy Kəngərlinin zəngin irsinə göstərilən yüksək ehtiramın bədii ifadəsidir. Natiq eyni zamanda, Azərbaycan ədəbiyyatında Bəhruz Kəngərli obrazını təhlil edib.
Sonda tədbir iştirakçıları muzeyin ekspozisiya zallarında nümayiş etdirilən sənət nümunələri ilə yaxından tanış olublar.
