Martın 28-də Naxçıvan Muxtar Respublikası Mədəniyyət və Təhsil Nazirliklərinin birgə təşkilatçılığı ilə Naxçıvan Yazıçılar Birliyinin sədri, Əməkdar mədəniyyət işçisi Asim Yadigarın və Xalq artisti, Cəlil Məmmədquluzadə adına Naxçıvan Dövlət Milli Dram Teatrının aktyoru Rövşən Hüseynovun 70 illik yubileyləri, Xalq artisti, Naxçıvan Dövlət Milli Dram Teatrının aktyoru Həsən Ağasoyun isə anadan olmasının 66-cı ildönümü münasibətilə məktəblilərlə görüşü keçirilib. Görüş torpaqlarımızın bütövlüyü uğrunda şəhid olan vətən övladlarının əziz xatirəsinin anılması və Dövlət Himninin səsləndirilməsi ilə başlayıb. Muxtar respublikanın təhsil müəssisələrinin müəllim və şagirdlərinin iştirak etdiyi tədbirdə çıxış edən Naxçıvan Muxtar Respublikasının təhsil naziri vəzifələrinin icraçısı, nazir müavini Elxan Nəcəfov və Naxçıvan Muxtar Respublikasının mədəniyyət naziri vəzifələrinin icraçısı, nazir müavini Həsən Seyidov görüşün əhəmiyyətindən danışıb, yubilyarları təbrik ediblər. Qeyd olunub ki, mədəniyyətimizin, ədəbiyyatımızın təbliği və tanıdılması məqsədi ilə muxtar respublikanın incəsənət nümayəndələrinin, şair və yazıçıların məktəblilərlə görüşü mütəmadi davam etdiriləcək.
Asim Yadigar, Həsən Ağasoy və Rövşən Hüseynov sənətlərinə göstərilən diqqətə görən minnətdarlıq ediblər.
Ardından şair Asim Yadigara Azərbaycan ədəbiyyatının inkişafı sahəsində uzunmüddətli səmərəli fəaliyyətlərinə görə, xalq artistlərinə isə teatr sahəsində uzunmüddətli səmərəli fəaliyyətinə görə Mədəniyyət Nazirliyi tərəfindən Fəxri Fərman,Təhsil Nazirliyi tərəfindən isə hədiyyə təqdim olunub.
Görüş bədii hissə ilə davam edib.
