Gülşən Adimin “Yarımçıq qalmış arzular” adlı kitabının təqdimatı keçirilib
Məmməd Səid Ordubadi adına Naxçıvan Muxtar Respublika Kitabxanasında Gülşən Adimin “Yarımçıq qalmış arzular” adlı kitabının təqdimatı keçirilib.
Tədqimat başlamazdan öncə torpaqlarımız uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.
Təqdimatı giriş sözü ilə Məmməd Səid Ordubadi adına Naxçıvan Muxtar Respublika Kitabxanasının direktoru Tamella Əsgərova açaraq qeyd edib ki, Gülşən xanımın müəllifi olduğu bu kitab həyat yoldaşı, ən çox “Səma mələyi” kitabının müəllifi kimi tanınan Adim Adıgözəldən bəhs edir. Adim Adıgözəl sözə dəyər verən, duyğularını sətirlərə köçürməyi bacaran bir ruha sahib idi. Kitabdakı yazıları oxuduqca Adim müəllimin yurda, Vətənə bağlılığını açıq-aydın görürük.
Naxçıvan Muxtar Respublikası Yazıçılar Birliyinin sədri, Azərbaycan Respublikasının Əməkdar mədəniyyət işçisi, şair, dramaturq Asim Yadigar “Elmə və təhsilə həsr olunmuş şərəfli ömür yolu”, Azərbaycan Respublikası Yazıçılar Birliyinin üzvü, Prezident mükafatçısı, şair, pedaqoq Qanun Ümman “Sədaqətin və dostluğun adı – Adim” və Məmməd Səid Ordubadi adına Naxçıvan Muxtar Respublika Kitabxanasının Qeydiyyat bölməsinin müdiri Elnurə Əsgərova “Yarımçıq qalmış şair ömrü” adlı mövzularla çıxış edərək bildiriblər ki, Adim Adıgözəl Kəlbəcər rayonunun Susuzluq kəndində doğulub. Məktəb illərində o, çalışqanlığı və nümunəvi davranışı ilə seçilib. Onun taleyi də, müəllimlik fəaliyyəti də Ordubad rayonu ilə bağlı olub. Ömrünün sonuna kimi Ələhli kənd məktəbində direktor işləyib. Yaxşı müəllim kimi rayon ictimaiyyətinin nüfuzunu qazanıb, həmçinin yaradıcılıqla da məşğul olub. Amansız ölüm onun bütün arzularını yarımçıq qoyub. Ömür-gün yoldaşı Gülşən xanım bu gün Adim Adıgözəlin yarımıq qalmış arzularını həyata keçirmək üçün çalışır. Oxuculara təqdim olunan kitabda Adim müəllim haqqında doğmalarının, əzizlərinin, tələbə və müəllim yoldaşlarının xatirələri, şairin yarımçıq qalmış ömrünün qəmli notları toplanıb. Adim müəllim dünyadan nakam köçsə də, o hər zaman xatirələrdə, yaddaşlarda, yazılarda yaşayacaq.
