“İnsan Hüquqları Aylığı” çərçivəsində “İnsan hüquqları ali dəyər kimi” mövzusunda maarifləndirici tədbir keçirilib.
Cəlil Məmmədquluzadə adına Naxçıvan Dövlət Milli Dram Teatrının Naxçıvan Muxtar Respublikası Bəstəkarlar Təşkilatının zalında təşkil olunan tədbiri giriş sözü ilə Naxçıvan Muxtar Respublikası Mədəniyyət Nazirliyi Aparatının rəhbəri Kamandar Ələkbərov açıb. O, insan hüquq və azadlıqlarının qorunmasının dövlət siyasətinin prioritet istiqamətlərindən biri olduğunu vurğulayaraq bu sahədə həyata keçirilən tədbirlərin əhəmiyyətindən danışıb.
Tədbirdə Naxçıvan Muxtar Respublikası Prokurorluğunun şöbə rəisi, baş ədliyyə müşaviri Faiq Səfərov insan hüquqlarının hüquqi təminat mexanizmləri, qanunvericilik bazası və vətəndaşların hüquqlarının müdafiəsi istiqamətində görülən işlər barədə məlumat verib. Naxçıvan Dövlət Universitetinin müəllimi Nuranə Kərimova isə insan hüquqlarının cəmiyyətin inkişafında rolu, hüquqi maarifləndirmənin əhəmiyyəti və insan ləyaqətinin qorunmasının vacibliyindən bəhs edib.
Çıxışlarda qeyd olunub ki, Azərbaycan Respublikasının İnsan Hüquqları üzrə Müvəkkili (Ombudsman) tərəfindən bu əlamətdar gün ərəfəsində ənənəvi olaraq 18 may – 18 iyun tarixləri “İnsan hüquqları aylığı” elan olunur. Aylıq Azərbaycan Respublikasının İnsan Hüquqları üzrə Müvəkkilinin (Ombudsman) təşəbbüsü ilə keçirilir və əsas məqsəd insan hüquq və azadlıqlarının təşviqi, hüquqi maarifləndirmənin artırılması, cəmiyyətdə hüquq mədəniyyətinin inkişaf etdirilməsi və insan hüquqlarının müdafiəsi sahəsində görülən işlər barədə ictimaiyyətin məlumatlandırılmasıdır. Həmçinin 18 iyun ölkəmizdə İnsan Hüquqları Günü kimi qeyd edilir.
Tədbir iştirakçıları ilə insan hüquqlarının müdafiəsi, hüquqi dövlət quruculuğu və vətəndaş məsuliyyəti mövzularında fikir mübadiləsi aparılıb, onları maraqlandıran suallar cavablandırılıb.
.jpeg)
.jpeg)