“Qarmon” ixtisası üzrə 5-ci sinif şagirdi Natiq Quliyevin Ordubad Şəhər İncəsənət Məktəbində solo konserti keçirilib
"Konstitusiya və Suverenlik İli" çərçivəsində Culfa Regional Mədəniyyət İdarəsinin tabeliyində fəaliyyət göstərən Bənəniyar Kənd Uşaq Musiqi Məktəbinin xalq çalğı alətləri şöbəsinin “Qarmon” ixtisası üzrə 5-ci sinif şagirdi Natiq Quliyevin Ordubad Şəhər İncəsənət Məktəbində solo konserti keçirilib.
Konsert proqramında gənc ifaçı Azərbaycan və xarici bəstəkarların seçilmiş əsərlərini yüksək peşəkarlıqla təqdim edib. İfa zamanı Natiq Quliyev öz istedadı, səhnə mədəniyyəti və musiqiyə olan sevgisi ilə tamaşaçıların böyük rəğbətini qazanıb.
Tədbirdə Culfa Regional Mədəniyyət İdarəsinin müdiri Azər Məmmədov gənc ifaçını təbrik edərək, ona gələcək yaradıcılıq fəaliyyətində yeni nailiyyətlər arzulayıb, eyni zamanda məktəbin bütün kollektivinə uğurlar diləyib. Daha sonra Ordubad Şəhər İncəsənət Məktəbinin direktoru Zülfiyyə Seyidova, Culfa Şəhər İncəsənət Məktəbinin direktoru Sahib Əliyev çıxış edərək bu cür tədbirlərin gənc musiqiçilərin inkişafına göstərilən diqqət və qayğının bariz nümunəsi olduğunu vurğulayıb.
Sonda Bənəniyar Kənd Uşaq Musiqi Məktəbinin direktoru Nazil Qulusoy öz minnətdarlığını bildirib. Qeyd edib ki, belə konsertlər gənc istedadların üzə çıxarılmasına və milli musiqi ənənələrimizin yaşadılmasına mühüm töhfə verir.
Qeyd edək ki, konsertdə konsertmeyster Səmənnaz Qurbanova, Nursan Cəfərli, nağarada Rasim Kazımov, zərb alətlərində isə Musa Məmmədli gənc istedadı yüksək peşəkarlıqla müşayiət ediblər.
Tədbirdə iştirak edən musiqisevərlər gənc ifaçının çıxışını alqışlarla qarşılayıblar.
