“Şərqin qapısı” teatr festivalı çərçivəsində Azərbaycan Dövlət Pantomima Teatrının quruluşçu rejissoru və pedaqoqu Ceyhun Dadaşov tərəfindən ustad dərsi keçirilib
C.Məmmədquluzadə adına Naxçıvan Dövlət Milli Dram Teatrının təşkilatçılığı ilə keçirilən “Şərqin qapısı” teatr festivalı çərçivəsində Azərbaycan Dövlət Pantomima Teatrının quruluşçu rejissoru və pedaqoqu Ceyhun Dadaşov tərəfindən ustad dərsi keçirilib.
“Pantomima – aktyor sənətinin tərkib hissəsi kimi” mövzusuna həsr olunan təlimdə festival iştirakçıları, teatr aktyorları, eləcə də Naxçıvan Dövlət Universitetinin “Teatr və mədəniyyətşünaslıq” kafedrasının tələbələri və Naxçıvan Musiqi Kollecinin aktyor sənəti ixtisası üzrə təhsil alan tələbələri iştirak ediblər.
Ustad dərsi zamanı pantomima sənətinin aktyor yaradıcılığındakı rolu, bədən plastikasının səhnə ifadə vasitəsi kimi əhəmiyyəti, emosiyaların sözsüz təqdim olunma texnikaları barədə ətraflı məlumat verilib. Təlim interaktiv müzakirələr və praktik məşqlərlə davam etdirilib.
Qeyd edək ki, “Şərqin qapısı” teatr festivalı müxtəlif tamaşalar, ustad dərsləri, panel müzakirələri və yaradıcı görüşlərlə teatr sənətinin inkişafına töhfə verməyi hədəfləyir.
