“Vətən üçün yaşayanlar – Şəhidlərimizi tanıyaq və anaraq yaradaq” adlı tədbir keçirilib
16 iyul 2025-ci il tarixində A.Babayev adına Naxçıvan Muxtar Respublika Uşaq Kitabxanasında Mədəniyyət Nazirliyinin “Yayın sehrli səhifələri” layihəsi çərçivəsində Vətən uğrunda canından keçmiş şəhid Aslan Mirzəyevin əziz xatirəsinə həsr olunmuş anım tədbiri keçirilib. “Vətən üçün yaşayanlar – Şəhidlərimizi tanıyaq və anaraq yaradaq” adlı tədbirin məqsədi gənc nəslə vətənpərvərlik hisslərini aşılamaq, qəhrəmanlarımızı tanıtmaq və onların əziz xatirəsini yaşatmaq olmuşdur.
Tədbiri giriş sözü ilə kitabxananın direktoru Ruzi Süleymanov açaraq şəhidlərin müqəddəs amal uğrunda göstərdikləri şücaətdən bəhs etmiş, belə tədbirlərin uşaqların vətənə bağlı ruhda formalaşmasında əhəmiyyətli rol oynadığını vurğulamışdır.
Qazilər İctimai Birliyinin sədri Təbriz Zeynalov “Vətən müharibəsi şanlı tariximizdir” mövzusunda çıxış edərək şəhid Aslan Mirzəyevin döyüş yoluna və ümumilikdə qəhrəman qazilərimizin igidliyinə diqqət çəkmişdir. Kitabxananın əməkdaşı Tərlan Məsumlu isə “Ən ülvi duyğudur Vətən sevgisi” adlı çıxışında Vətənə bağlılığın milli-mənəvi dəyərlərimizdəki yerindən bəhs etmişdir.
Tədbir uşaqların şəhidlərə həsr olunmuş şeirlər səsləndirməsi ilə davam etmiş, daha sonra “Qəhrəmanımı çəkirəm” adlı yaradıcılıq hissəsində balaca oxucular vətənpərvərlik və qəhrəmanlıq hislərini rəsmlə ifadə etmişlər. Sonda şəhid Aslan Mirzəyevin həyat və döyüş yolunu əks etdirən video slayd nümayiş olunmuşdur.
Tədbirdə Qazilər İctimai Birliyinin üzvləri, şəhid Aslan Mirzəyevin ailə üzvləri, kitabxana əməkdaşları və oxucular iştirak etmişdir.
