Xalq artisti Ağaverdi Paşayevin 75 illik yubileyinə həsr olunmuş yaradıcılıq gecəsi keçirilib
Naxçıvan Muxtar Respublikası Mədəniyyət Nazirliyinin təşkilatçılığı ilə Heydər Əliyev Sarayında Xalq artisti, Prezident təqaüdçüsü, "Şöhrət" ordenli sənətkar, dirijor və pedaqoq Ağaverdi Paşayevin 75 illik yubileyinə həsr olunmuş yaradıcılıq gecəsi keçirilib.
Tədbirdə dövlət rəsmiləri, incəsənət xadimləri iştirak ediblər.
Yubiley gecəsində Naxçıvan Dövlət Filarmoniyasının Xalq Çalğı Alətləri Orkestri və Xor kollektivi konsert proqramı təqdim edib. Konsertə Xalq artisti, professor Ağaverdi Paşayev, Əməkdar artist Elman Əliyev və Prezident mükafatçısı Hakim Məmmədli drijorluq ediblər. Üzeyir Hacıbəylinin “Koroğlu” operasından “Uvertüra” ilə başlayan konsertdə Azərbaycan Respublikasının Əməkdar artisti Vilayət İsmayılov, Naxçıvan Muxtar Respublikasının əməkdar artistləri Elçin Nağıyev, Ruhiyyə Hüseynova, Zülfüqar Mahmudov eləcə də Əfsanə Babayeva, Nərmin Hüseynova, Əsəmər Tahirli, Sevinc Piriyevanın ifalarında “Vətənimdir”, “Aişənin rəqsi”, “Məhəbbət”, “Bir könül sındırmışam”, “Zəfər himni”, “Heyf”, “Naxçıvan şikəstəsi”, “Gözünə qurban”, “Rapsodiya” və digər musiqi nömrələri səsləndirilib.
Çıxış edənlər yubilyarı təbrik edib, ona xoş arzularını çatdırıblar.
Sonda Naçıvan Muxtar Respublikasının mədəniyyət nazirinin müavini, nazir vəzifələrini icra edən Həsən Seyidov Ağaverdi Paşayevi təbrik edib, ona Nazirliyin Fəxri Fərmanını təqdim edib.
