Şairin Şahbuz rayonunun Nursu kəndində yerləşən Ev Muzeyində keçirilən tədbiri giriş sözü ilə açan muzeyin direktoru Əzizə Süleymanova bildirib ki, xalq şairi Məmməd Araz çoxcəhətli və zəngin ədəbi irsinə, sənətkarlıq qüdrətinə görə Azərbaycan ədəbiyyatında özünəməxsus yeri və mövqeyi olan söz ustasıdır. Məmməd Arazın söz dünyası illər keçsə də öz dəyərini və təsir gücünü qoruyub saxlayır. Bu muzey həmin söz dünyasının canlı yaddaşı, şairin poeziyasının gələcək nəsillərə ötürülməsində mühüm rolu olan bir mədəniyyət ocağıdır.
Daha sonra AMEA Naxçıvan Bölməsinin filologiya üzrə fəlsəfə doktoru, dosent Ramiz Qasımov və Naxçıvan Dövlət Televziyasının baş redaktoru Fariz Əhmədov çıxış ediblər. Çıxışlarda diqqətə çatdırılıb ki, ana dilimiz bütün zənginliyi, dərinliyi, əlvanlığı ilə məhz onun yaradıcılığında vətəndaşlıq məhəbbəti qazanıb. Onun vətən duyğulu şeirləri poeziyamızda özünəməxsus yer tutur. Xalq şairi Məmməd Araz müasir dövr Azərbaycan lirikasının poetik zirvəsini fəth edən və bu zirvədə əbədi yaşamaq haqqı qazanan qüdrətli şair, publisist, filosof və sözün həqiqi mənasında layiqli vətəndaşdır.
Daha sonra Məmməd Arazın yaxın qohumları Elvin İbrahimov, Namiq Abbasov, Xatirə İbrahimova şairlə bağlı xatirələrini bölüşüblər.
Tədbirin bədii hissəsində Nursu kənd tam orta məktəbinin şagirdlərinin ifasında şairin şeirləri qiraət olunub.
Sonda muzeyin ekspozisiyasına baxış keçirilib.