Yubiley tədbiri keçirilib
Məmməd Səid Ordubadi adına Naxçıvan Muxtar Respublika Kitabxanasında şair, dramaturq Həsən Fətullayevin anadan olmasının 100 illik yubileyi münasibətilə tədbir keçirilib.
Tədbiri giriş sözü ilə Məmməd Səid Ordubadi adına Naxçıvan Muxtar Respublika Kitabxanasının direktoru Tamella Əsgərova açaraq qeyd edib ki, bir sıra vəzifələrdə çalışmasına baxmayaraq Həsən Fətullayev həm də bədii yaradıcılıqla məşğul olub. Onun Naxçıvan ədəbi mühitinin inkişafında gördüyü işlər danılmazdır.
AMEA Naxçıvan Bölməsinin İncəsənət, Dil və Ədəbiyyat İnstitutunun Ədəbiyyatşünaslıq şöbəsinin müdiri, filologiya üzrə fəlsəfə doktoru, dosent Ramiz Qasımov “Elini sevən el sənətkarı – Həsən Elsevər”, Naxçıvan Muxtar Respublikası Yazıçılar Birliyinin sədri, Azərbaycan Respublikasının əməkdar mədəniyyət işçisi, yazıçı, şair, dramaturq Asim Yadigar “Həsən Elsevər yaradıcılığı”, Naxçıvan Muxtar Respublikası Ali Məclisinin deputatı Aysel Dünyamalıyeva “Həsən Elsevər haqqında”, “Günəş Uşaq Akademiyasının təsisçi-direktoru, “Günəş” uşaq jurnalının baş redaktoru, jurnalist, pedaqoq Ulduz Əliyeva “Həsən Fətullayev əqidəsi” adlı mövzularla çıxış edərək bildiriblər ki, vətəninə, elinə bağlı olan Həsən Fətullayev “Elsevər” imzası ilə bir çox şeirlərin, poemaların, nəsr əsərlərinin müəllifidir. Onun mövzu dairəsi olduqca genişdir. Ədibin əsərlərinin bir çoxunda xalqımızın mərd, igid oğul və qızlarının ülvi məhəbbəti, yüksək vətənpərvərliyi qələmə alınıb.
Tədbirdə ədibin qələm yoldaşları, yaxınları Həsən Fətullayev ilə bağlı xatirələrini paylaşıb, Günəş Uşaq Akademiyasının dərnək üzvləri şeirlərini bədii qiraət edib. Həyat yoldaşı Aynişan xanım tədbirin təşkili üçün minnətdarlığını bildirib.
Sonda sərgiyə baxış olub.
