A. Babayev adına Naxçıvan Muxtar Respublika Uşaq Kitabxanası 04 noyabr 2024-cü il tarixdə “Zəfər Günü” ilə əlaqədar “Tarixi zəfərimiz qürur mənbəyimizdir” başlığı adı altında şəhid ailələri ilə birlikdə tədbir keçirilib.
Tədbiri əvvəlcə Kitabxananın direktoru Ruzi Süleymanov açaraq qeyd etdi ki, 30 ilə qədər işğal altında qalan Azərbaycan torpaqlarının azad olunması ilə nəticələnən Vətən müharibəsi müasir Azərbaycan tarixinin parlaq səhifəsinə çevrilmişdir. Vətən müharibəsində qazandığımız Zəfər Azərbaycan xalqının mübarizliyini, ölkəmizdə xalq-ordu-rəhbər vəhdətinin sarsılmazlığını bütün dünyaya nümayiş etdirdi.
Naxçıvan Muxtar Respublikasının Mədəniyyət Nazirliyinin Mətbuat və İctimaiyyətlə əlaqələr üzrə baş məsləhətçisi Məmməd Hüseynli “Zəfərimiz ən dəyərli əmanətimizdir” adlı məruzə ilə çıxış edərək bildirmişdir ki, 44 günlük Vətən müharibəsi Müzəffər Ali Baş Komandan cənab İlham Əliyevin rəhbərliyi ilə qazanılan şanlı tarixi qələbəmizdir. Qarabağın tacı olan qədim Şuşanın işğaldan azad edilməsinin ardınca böyük qələbənin qazanılması xalqımızın tarixində yeni bir əbədi tarix yazdı.
Kitabxananın Komplektləşdirmə, kataloqlaşdırma və kitabişləmə şöbəsinin şöbə müdiri Nüşabə Seyidovanın “Zəfərə gedən yol” adlı çıxışından sonra Şəhid Sadiqov Eminin anası Naxçıvan Muxtar Respublikası Ali Məclisinin deputatı Gülşad Rüstəmova və Şəhid Rəcəbov Vaqifin anası Rəcəbova Məryəm çıxış edərək bildirdilər ki, hər birimizin vətəndaşlıq borcudur ki, şəhidlikləri ilə bizə qələbə sevinci yaşadan oğullarımızı daim qəlbimizdə yaşadaq, xatirələrinə dərin ehtiram bəsləyək
Sonda oxucuların səsləndirdiyi şeirlər dinlənildi, video slayta və sərgiyə baxış keçirildi.
